Hinsegin dagar í Reykjavík – Gay Pride

Lög félagsins

1. Heiti og hlutverk

1.1. Félagið heitir Hinsegin dagar í Reykjavík – Gay Pride, og hefur aðsetur í Reykjavík.

1.2. Markmið félagsins er:

– að halda árlega hinsegin hátíð í Reykjavík,

– að stuðla með starfsemi sinni að vexti og viðgangi hinsegin menningar og félagslífs í íslensku samfélagi,

– að rækta tengsl við erlendar hreyfingar Gay Pride hátíða og taka þátt í skipulögðu samstarfi við þær.

 

2. Félagsaðild

2.1. Félagar geta allir þeir gerst sem vilja styðja markmið félagsins og vinna að markmiðum þess. Bæði einstaklingar og félagasamtök geta gerst félagar.

2.2. Félagar fá félagsskírteini sem gildi á milli aðalfunda. Þeir einir teljast gildir félagar sem greitt hafa félagsgjöld.

2.3. Stjórnin ber ábyrgð á félagaskrá sem einungis er til afnota fyrir stjórn og starfsfólk félagsins.

 

3. Aðalfundur

3.1. Aðalfundur fer með æðsta ákvörðunarvald félagsins. Hann skal halda í byrjun árs, eigi síðar en 1. mars. Rétt til fundarsetu með kosningarétt og kjörgengi hafa einungis félagar með gilt félagsskírteini.

3.2. Til aðalfundar skal boða skriflega með mánaðar fyrirvara og um leið skal lýsa eftir framboðum til stjórnarkjörs. Framboð skulu hafa borist stjórn skriflega viku fyrir aðalfund. Frambjóðendur skulu tilgreina þau embætti sem þeir sækjast eftir. Til að njóta kjörgengis til stjórnarkjörs skulu félagar hafa að minnsta kosti starfað með samstarfsnefnd að einni hátíð Hinsegin daga. Kosið er um einstaklinga en ekki lista.

3.3. Tillögur að lagabreytingum skulu hafa borist stjórn félagsins hálfum mánuði fyrir aðalfund og þær kynntar fyrir félagsmönnum. Undanþegnar þessum skilafresti eru tillögur sem lúta að orðalagi og formi en breyta á engan hátt efnislegu innihaldi laganna eða áður fram kominna tillagna.

3.4. Verkefni aðalfundar eru:

1. Kosning fundarstjóra og fundarritara

2. Skýrsla stjórnar

3. Reikningar fyrra árs. Drög að fjárhagsáætlun nýs árs. Ákvörðun félagsgjalda.

4. Lagabreytingar

5. Kjör stjórnar og tveggja félagslegra endurskoðenda.

6. Önnur mál

Aðalfundur telst lögmætur sæki hann 10 félagsmenn hið fæsta.

 

4. Stjórn

4.1. Félagar kjósa stjórn á aðalfundi til að gegna embættum forseta, ritara, gjaldkera, erindreka og framkvæmdastjóra. Hver stjórnarmaður er kosinn til tveggja ára í senn. Kosning skal vera leynileg.

Hver einstaklingur getur ekki gegnt sama embætti í stjórn oftar en þrjú kjörtímabil samfleytt (sex ár) og ekki átt samfellda setu í stjórn félagsins lengur en í fimm kjörtímabil (tíu ár). Eftir að hafa verið utan stjórnar í eitt kjörtímabil (tvö ár) verður fyrrverandi stjórnarmaður sem áður hefur setið hámarkstíma í stjórn, aftur kjörgengur til embættis í stjórn.

4.2. Stjórnin fer með umboð Hinsegin daga í Reykjavík – Gay Pride og ákvörðunarvald næst aðalfundi og kemur fram fyrir hönd þess.

4.3. Ef einhver stjórnarmanna hverfur úr stjórn á kjörtímabili skal stjórnin skipa staðgengil hans úr röðum félagsmanna. Ef fleiri en tveir stjórnarmaður hverfa úr stjórn, skal stjórnin kalla til félagsfundar og efna þar til kosninga um nýja stjórnarmenn til næsta aðalfundar.

4.4. Forseti er oddviti stjórnar og stýrir fundum hennar. Í samráði við stjórn ber hann ábyrgð á að starfsemi félagsins fari samkvæmt lögum. Ritari sér um ritun fundargerða á stjórnarfundum og undirritar þær með forseta; ritari gætir einnig félagatals og stýrir fundum stjórnar í fjarveru forseta. Gjaldkeri ber ábyrgð á fjárreiðum félagsins. Erindreki sér um liðsafnað til verkefna og kynnir þau fyrir félögum. Framkvæmdastjóri hefur umsjón með framkvæmd verkefna sem fyrir liggja hverju sinni.

4.5. Stjórnin skal halda minnst 5 stjórnarfundi á ári. Stjórnarfundir eru lögmætir ef einfaldur meirihluti stjórnar er til staðar.

4.6. Stjórn skipar starfsmenn og nefndir til einstakra verka eftir því sem þurfa þykir, svo sem til fjáröflunar, samskipta við fjölmiðla, göngustjórnar, dagskrárstjórnar hátíðahalda, ritstjórn vefsíðu og dagskrárrits. Stjórn ábyrgist gerðir þessara aðila og fylgist með því að settum lögum og starfsreglum sé fylgt. Stjórn hefur umboð til að skipa launað starfsfólk til tiltekinna verka.

 

5. Samstarfsnefnd

5.1. Samstarfsnefnd um Hinsegin daga starfar með stjórn að verkefnum hvers árs. Allir félagar með gilt félagsskírteini eiga rétt til þátttöku í samstarfsnefnd. Halda skal skrá yfir virka félaga í samstarfsnefnd á hverju ári. Stjórn skal boða til fundar í samstarfsnefnd og senda fundarboð til félaga. Forseti stjórnar og/eða fulltrúi hans stýrir fundum hennar og halda skal fundargerðir þessara funda.

Samstarfsnefnd er stjórn til stuðnings og aðhalds, hún gerir tillögur til stjórnar og myndar kjarnann í framkvæmdaafli félagsins í samvinnu við stjórn. Samstarfsnefnd fer einungis með tillögurétt en ákvörðunarvald milli aðalfunda er í höndum stjórnar.

 

6. Fjármál

6.1. Gjaldkeri hefur eftirlit með öllum fjármunahreyfingum félagsins. Þær fara fram á banka­reikningum Hinsegin daga í Reykjavík – Gay Pride sem gjaldkeri gerir grein fyrir í ársreikningum á aðalfundi. Reikningsár félagsins miðast við almanaksárið.

6.2. Gjaldkeri skal á aðalfundi leggja fram fjárhagsáætlun sem fundurinn samþykkir. Stjórn er heimilt að endurskoða þá fjárhagsáætlun á starfsárinu og leggja hana fyrir fulltrúa í samstarfsnefnd til umræðu og athugasemda.

6.3. Verði hagnaður af rekstri félagsins, skal stjórn árlega gera tillögur til aðalfundar um veitingu fjárstyrkja á næsta starfsári í því skyni að efla menningar- og félagsstarf hinsegin fólks á Íslandi, skv. markmiðum félagsins eins og þeim er lýst í grein 1.2., lið 2.

 

7. Lagabreytingar og félagsslit

7.1. Lögum þessum verður ekki breytt nema með samþykkt á aðalfundi og þá með einföldum meirihluta greiddra atkvæða.

7.2. Félagið verður ekki lagt niður nema með samþykkt á aðalfundi sem hlotið hefur sömu meðferð og tillögur að lagabreytingum, og þá með 2/3 hluta greiddra atkvæða. Eignir félagsins skulu þá renna til skyldra félagasamtaka skv. ákvörðun fundarins. Ákvörðun um að leggja niður félagið öðlast þó ekki gildi nema hún sé staðfest á nýjum fundi sex mánuðum eftir aðalfund og þá með 2/3 hluta greiddra atkvæða.

Lög þessi voru samþykkt á aðalfundi 2007.

Síðari málsgrein í grein 4.1. var aukið við lögin á aðalfundi 2010.