Gleðigangan

 

Í gleðigöngu Hinsegin daga staðfestir hinsegin fólk tilveru sína, sýnileika og gleði. Þar sameinast lesbíur, hommar, tvíkynhneigðir og transfólk í einum hópi ásamt fjölskyldum sínum og vinum. gleðigangan er hápunktur og stolt hátíðarinnar. Hinsegin dagar skipuleggja hana og ráða alfarið hvaða atriði fá aðgang að henni. Gangan er engu að síður sprottin úr grasrótinni og það eru einstaklingar og hópar sem móta og setja saman einstök atriði hennar.

Í ár fær gangan nokkuð annan svip en áður. Í stað þess að ganga Laugaveg, eins og við höfum gert frá upphafi, er nú stillt upp á Vatnsmýrarvegi, gengið norður Sóleyjargötu, eftir Fríkirkjuvegi og Lækjargötu og framhjá Arnarhóli þar sem útitónleikarnir eru haldnir að lokinni göngu (sjá kort í dagskrárritinu 2011).

Með þessari nýju gönguleið fá atriðin og vagnarnir mikið og voldugt rými sem áður var óþekkt og því er mikilvægt að þátttakendur vandi skreytingar á vögnum sínum. Atriðum í gleðigöngunni fjölgar ár frá ári og mörg hver hafa verið einstaklega glæsileg. Hinsegin dagar leggja áherslu á það að hvert atriði miðli skilaboðum sem varða veruleika hinsegin fólks á einn eða annan hátt. Skilaboðin geta verið með óteljandi móti og þar skiptir hugkvæmni þátttakenda miklu máli. Til þess að setja upp gott atriði þarf líka að hugsa málin með fyrirvara. Bestu atriðin kosta oftar en ekki litla peninga. Gott ímyndunarafl og liðsstyrkur vina og vandamanna hrekkur langt.

Það er algerlega óheimilt að auglýsa fyrirtæki eða þjónustu í göngunni án samráðs við Hinsegin daga. Eingöngu fyrirtæki sem styðja eða auglýsa hjá Hinsegin dögum mega auglýsa í göngunni og fjöldi auglýsinga í henni er takmarkaður.

Leikstjórar til aðstoðar

Hinsegin dagar bjóða nú í fyrsta sinn aðstoð leikstjóra sem gefa góð ráð til göngufólks um það hvernig atriðin megi njóta sín sem best. Ræðið hugmyndir ykkar við ráðgjafa okkar og þau benda á leiðir sem þurfa ekki að kosta mikið en kunna að setja ótrúlega flottan svip á atriðin ykkar. Leikstjórarnir sem veita aðstoð og gefa góð ráð eru Tyrfingur Tyrfingsson, tyrfingur@gmail.com – 691 5209, og Ásdís Þórhallsdóttir, asdis.th@gmail.com – 865 2545. Þau hafa mikla reynslu af götuleikhúsi og uppákomum af öllu tagi.

 

Skráning og þátttaka

Þátttakendur sem ætla að vera með formleg atriði í gleðigöngunni verða að sækja um það til Hinsegin daga eigi síðar en 1. ágúst og geta þá jafnframt sótt um göngustyrk. Nauðsynlegt er að skrá atriði með því að fylla út eyðublað sem finna má á vefsíðunni og senda það síðan í tölvupósti til göngustjóra á netfangið gongustjori@gmail.com. Nánari upplýsingar veita göngustjórarnir Helga, Ásta og Setta en hægt er að senda þeim póst á gongustjori@gmail.com eða hafa samband við þær í síma. Athugið að ekki er hægt að veita fólki með atriði aðgang að göngunni nema það hafi verið tilkynnt skilmerkilega til göngustjóra. Öllum er velkomið að taka þátt í göngunni en Hinsegin dagar leggja áherslu á að það fólk sem vill taka þátt í göngunni án þess að vera með sérstakt atriði fylgi henni frá upphafi. Aðrir eru vinsamlega beðnir um að bíða með að slást í hópinn þar til síðasti vagninn hefur farið framhjá.

 

Uppstilling

Byrjað verður að raða göngunni upp á Vatnsmýrarvegi kl. 12:00, laugardaginn 6. ágúst og þeir þátttakendur sem eru með atriði verða skilyrðislaust að mæta á þeim tíma til að fá sitt númer og fara í röð. Gangan leggur stundvíslega af stað kl. 14 og bíður ekki eftir neinum.

Göngustyrkir

Hinsegin dagar veita minni háttar fjárstyrki til einstakra gönguatriða. Umsóknir um styrki verða að berast göngustjórn um leið og sótt er um þátttöku og styrkir eru greiddir út eftir hátíðina í ágúst, þó einungis gegn framvísun reikninga. Ekki er veittur styrkur til að kosta farartæki og eldsneyti. Gæði atriðanna skipta líka máli en sérstök dómnefnd starfar á göngudaginn og metur bestu atriðin. Hinsegin dagar áskilja sér rétt til að samþykkja eða hafna öllum beiðnum um styrki í samræmi við fjárhag hátíðarinnar.

ÖLL SÖLUSTARFSEMI Á GÖNGULEIÐINNI OG VIÐ ARNARHÓL Á MEÐAN GANGAN OG ÚTISKEMMTUN FER FRAM ER ÓHEIMIL ÁN LEYFIS HINSEGIN DAGA, SAMKVÆMT SAMNINGI HINSEGIN DAGA OG REYKJAVÍKURBORGAR. ALLT STARFS- OG SÖLUFÓLK Á VEGUM HINSEGIN DAGA ER SÉRSTAKLEGA AUÐKENNT.

Til að fá að hafa atriði í göngunni er nauðsynlegt að sækja um það með því að senda inn þar til gert umsóknareyðublað.

Umsóknareyðublaðið þarf að berast göngustjórum Hinsegin daga eigi síðar en 1. ágúst.

Göngustjórar og öryggisstjóri Hinsegin daga eru:

Ásta Kristín Benediktsdóttir göngustjóri sími 775 3561	Helga Kristjana Bjarnadóttir göngustjóri sími 775 3562	Sesselja  María Mortensen göngustjóri sími 775 3563	Eva Jóhannsdóttir öryggisstjóri simi 775 3564

 
Kynnið ykkur og virðið öryggisreglur Hinsegin daga

Allar nánari upplýsingar um gleðigönguna veita göngustjórarnir Ásta, Sesselja og Helga.

http://LTtravel.com