HINSEGIN DAGAR

Skýrsla stjórnar Hinsegin daga

7.3.2009

Aðalfundur Hinsegin daga í Reykjavík – Gay Pride var haldinn í Regnbogasal Samtakanna ´78 laugardaginn 8. mars 2008. Fylgt var dagskrá félagslaga um hefðbundin aðalfundarstörf. Í stjórn þessa starfsárs sitja Þorvaldur Kristinsson og Katrín Jónsdóttir (bæði kjörin til tveggja ára á aðalfundi 2008), Heimir Már Pétursson, Kristín Sævarsdóttir og Þórarinn Þór (öll kjörin til tveggja ára á aðalfundi 2007). Samstarfsnefnd Hinsegin daga er öllum opin sem vilja vinna að hátíðinni og hún starfaði áfram ötullega með stjórn á árinu. Stjórn hélt 10 fundi, og auk þess 16 fundi með samstarfsnefnd sem hittist reglulega allt fram á hátíðisdag.

Samkeppni um merki Hinsegin daga

Í tilefni af 10 ára afmæli hátíðarinnar var efnt til samkeppni um merki eða lógó hennar og var þátttaka góð. Kristinn Atlason varð hlutskarpastur í samkeppninni sem auglýst var á auglýsingastofum og á vettvangi Listaháskóla Íslands, og rausnarleg verðlaun voru veitt. Í dómnefnd sátu Vallý Helgadóttir og Þórarinn Þór frá Hinsegin dögum í Reykjavík, svo og Guðmundur Oddur Magnússon, prófessor við hönnunardeild LHÍ, og var dómnefndin á einu máli um að verðlauna tillögu Kristins.

Kynningarstarf, dagskrárrit, vefsíða og Facebook

Í annarri viku júlí kom út dagskrárrit Hinsegin daga í 20.000 eintaka upplagi, en Tómas Hjálmarsson hannaði blaðið að vanda, svo og götuauglýsingar, fjölmiðla- og upplýsingaefni til auglýsenda. Þorvaldur Kristinsson hafði umsjón með textagerð ásamt Heimi Má Péturssyni og Erlingi Ó. Thoroddsen. Af öðru útgáfuefni má nefna boli Hinsegin daga og ýmsan varning með merki hátíðarinnar.

Dagskrárriti hátíðarinnar var dreift um Stór-Reykjavíkursvæðið, en fimmtungur upplagsins fór út á land. Í vikunni fyrir hátíðina birtust heilsíðuauglýsingar á dagblöðum. Þá var vefsíða hátíðarinnar að vanda mjög virk mánuðina fyrir hátíðina, en Heimir Már Pétursson er ritstjóri hennar. Frá 1. janúar 2008 til 5. mars 2009, hafa um 29 þúsund heimsóknir verið á hana og síðuflettingar 65 þúsund á sama tíma. Um helmingur gesta vefsíðunnar voru Íslendingar, en helmingur frá öðrum löndum, flestir frá Bandaríkjunum, þá Bretlandi, Þýskalandi og Norðurlöndum. Gestir vefsíðunnar eru alls frá u.þ.b. 130 þjóðríkjum.

Á árinu var stofnuð Facebook-síða Hinsegin daga og hafa hátt á annað þúsund manns skráð sig vini hátíðarinnar á henni.

Mynddiskur með kynningarefni og sögulegum viðburðum.

Þremur vikum fyrir hátíðina hófst kynningarherferð með viðtölum við fulltrúa Hinsegin daga á útvarps- og sjónvarpsstöðvum. Í tilefni af tíu ára afmælinu var tekið saman þriggja klukkustunda efni á DVD mynddisk, með fjölbreyttu efni frá fyrri hátíðum. Þar munaði mest um framlag Krumma Films í eigu Hrafnhildar Gunnarsdóttur, sem útbjó mest af efninu til útgáfu, en einnig veitti Stöð 2 leyfi til notkunar á myndefni í hennar eigu. Sírnir Hallgrímur Einarsson grafíkmaður á Stöð 2 sá um hönnun útlits á disknum og hulstri hans en Ómar Daði Kristjánsson klippari á Stöð 2 setti efni disksins saman ásamt Heimi Má Péturssyni, sem hafði umsjón með útgáfunni. Diskurinn var notaður við kynningu á hátíðinni til fjölmiðla og fylgdi með í VIP-Platinum pakka hátíðarinnar. Diskurinn er ómetanleg heimild um tíu ára sögu Hinsegin daga í Reykjavík.

Kaupfélag Hinsegin daga

Sú nýjung var tekin upp á þessu ári að opna verslun þremur vikum fyrir hátíðina á Laugavegi 33. Guðjón R. Jónasson sá um að útvega Hinsegin dögum húsnæðið, en Sæmundur Elísson annaðist smíðar og viðgerðir í kaupfélaginu fyrir opnun. Þorvaldur Kristinsson, Jón Sævar Baldvinsson og Kristín Sævarsdóttir héldu utan um reksturinn sem gekk sérlega vel og jók mjög söluveltu hátíðarinnar. Sami hópur skipulagði síðan sölumál á hátíðisdaginn. Um sextíu harðsnúnir sjálfboðaliðar komu að sölunni þann dag auk tíu manna hóps sem skiptist á að starfa í búðinni þær þrjár vikur sem hún var opin.

Fjölbreytt verkefni

Ýmsir höfðu forystu um ábyrgðarmikil verkefni við undirbúning hátíðarinnar: Heimir Már Pétursson var framkvæmdastjóri hennar, stýrði kynningarstarfi innanlands og utan, bókaði húsnæði fyrir opnunarhátíð, tónleika og dansleiki, sá um ráðningu erlendra listamanna, en ásamt Þorvaldi Kristinssyni safnaði hann auglýsingum til styrktar hátíðinni. Katrín Jónsdóttir og Fríða Agnarsdóttir stýrðu göngu og verkstæði og leiddu allan þann mikla undirbúning ásamt Valgerði Ægisdóttur. Svavar Jónsson var öryggisstjóri hátíðarinnar, Ásdís Þórhallsdóttir sviðsstjóri og vann það margþætta verk í félagi við Baldvin K. Sveinbjörnsson, Birnu Hrönn Björnsdóttur, Erling Thoroddsen, Evu Maríu Þórarinsdóttur og Matthías Matthíasson, en Þórarinn Þór stjórnaði öllum fjármunafærslum hátíðarinnar.

Vallý Helgadóttir annaðist móttökustjórn hátíðarinnar ásamt Valgerði Þ.E. Guðjónsdóttur, og Ragnar Ólason stýrði fánaberum og fánaborgum. Þá komu Anna Jonna Ármannsdóttir, Árni Kristjánsson og Elaine McCrorie að ýmsum verkefnum. Guðjón R. Jónasson og Þorvaldur Kristinsson önnuðust dreifingu dagskrárritsins ásamt fleirum.

Ýmsir komu að stjórn dansleikja og skulu hér nefnd þau Birna Hrönn Björnsdóttir, Eva María Þórarinsdóttir og Páll Óskar Hjálmtýsson sem báru hita og þunga af músíkinni á dansleikjum hátíðarinnar. Er þá enn ótalinn fjöldi fólks sem af örlæti sínu lagði Hinsegin dögum lið í hátíðarvikunni. Þó skal hér nefndur 20 manna hópur frá SEEDS, alþjóðlegri ungmennaskiptahreyfingu sem nú aðstoðaði í annað sinn.

Ekki tókst að opna gönguverkstæði eins og venja hefur verið þar sem frambærilegt húsnæði var ekki að finna í miðborginni, en þó áttu minni umsvif gleðigöngunnar skjól í húsnæði Skapandi sumarstarfa Reykjavíkurborgar á Lindargötu. Á efri hæð hússins á Laugavegi 33 hafði söludeild hátíðarinnar aðsetur og þar var miðstöð undirbúnings síðustu vikur fyrir hátíðina.

Dagskrá hátíðarinnar

Að þessu sinni var hátíðin lengri en nokkru sinni fyrr, hún hófst á miðvikudegi og lauk á sunnudegi. Heiðursgestur hennar að þessu sinni var Svyatoslav Sementsov frá Hvíta Rússlandi, sem er einn baráttumanna þar í landi fyrir mannréttindum hinsegin fólks og hátíðin hófst með fyrirlestri hans í Regnbogasal Samtakanna ’78 miðvikudagskvöldið 6. ágúst. Þar sagði hann frá stöðu mála í heimalandi sínu og ýmsum ríkjum Austur-Evrópu og svaraði fyrirspurnum fimmtíu gesta, íslenskra og erlendra, sem voru mættir til að kynna sér málin á ágætum fundi.

Fimmtudaginn 7. ágúst hófst hátíðin á hádegi með því að Martin Knudsen frá Kaupmannahöfn söng danskar vísur og gömul dægurlög á Jómfrúnni við afbragðs undirtektir og það endurtók hann aftur í hádeginu næsta dag. Síðdegis á fimmtudegi var opnuð ljósmyndasýning eftir Wolfgang Müller frá Berlin, safn 14 mynda sem hann tók af íslenskum hommum fyrir um 15 árum og eru merkileg söguleg heimild um eitt skeið sögu okkar. Munu æsir mig argan kalla nefndist sýningin sem stóð í sal Borgarbókasafnsins til mánaðamóta, en Hrafnkell Sigurðsson, Ragna Guðmundsdóttir og Veturliði Guðnason önnuðust undirbúning hennar og uppsetningu.

Að kvöld sama dags hófst opnunarhátíð Hinsegin daga sem nú var í fyrsta sinn haldin í stóra sal Háskólabíós og degi fyrr en venja er. Fyrst söng Andrea Gylfa „Somewhere over the rainbow“ og Heimir Már flutti opnunarræðu hátíðarinnar, en Felix Bergsson var kynnir kvöldsins. Síðan birtist dúóið Elín & Myrra, en Natthawat Voramool söng taílenska söngva þjóðar sinnar með stórum hópi dansara og Maríus Sverrisson skemmti með söngleikjatónlist við undirleik hljómsveitar. Eftir hlé komu fram í þriðja sinn á Íslandi þær Ruth & Vigdis frá Ósló sem notið hafa vinsælda á fyrri hátíðum Hinsegin daga. Ásdís Þórhallsdóttir og liðsmenn hennar stýrðu sviði og skreytingum en í anddyri lék Reynir Jónasson á harmóníku áður en hátíðin hófst. Drottningar dreifðu rósum til gesta sem voru um 750 og var þetta fjölmennasta opnunarhátíð Hinsegin daga frá upphafi.

Föstudagskvöldið 8. ágúst skemmti Carole Pope á tónleikum á Organ og á miðnætti voru hin hefðbundnu kynjaböll haldin á Organ og Tunglinu. Laugardaginn 9. ágúst hélt svo gleðiganga Hinsegin daga af stað frá Hlemmi kl. tvö í besta veðri og stefndi á Arnarhól þar sem útitónleikar hátíðarinnar voru haldnir í annað sinn á nýju sviði að viðstöddum um eða yfir 70.000 manns.

Árni Pétur Guðjónsson og Aðalbjörg dóttir hans kynntu dagskrárliði, en Ingibjörg Sólrún Gísladóttir utanríkisráðherra var ræðumaður dagsins. Síðan tróðu upp skemmtikraftar hátíðarinnar, Carole Pope, Swivel, Stereo Total, Regína og Friðrik Ómar, Haffi Haff, Hera Björk, Andreas Constantinou, Páll Óskar og Vigdis & Ruth. Um kvöldið héldu Stereo Total frá Berlín og bandaríska hljómsveitin Swivel tónleika á Organ, en síðan hófst hátíðardansleikur næturinnar á NASA. Einnig voru hinsegin dansleikir haldnir á Organ, Tunglinu og á Q-bar, sem var eins konar klúbbur Hinsegin daga alla helgina. Þá hélt MSC-Ísland garðveislu sína og hélt úti opnu húsi fyrir gesti þessa nótt.

Að kvöldi sunnudagsins 10. ágúst var regnbogamessa í Dómkirkjunni að viðstöddum 70 kirkjugestum. Sr. Anna Sigríður Pálsdóttir predikaði en Hjálmar Jónsson og Þorvaldur Karl Víðisson þjónuðu fyrir altari. Flokkur söngvara undir stjórn Jóns Þorsteinssonar leiddi safnaðarsöng. Krumma Films kvikmyndaði gleðigönguna og dagskrána á Arnarhóli undir stjórn Hrafnhildar Gunnarsdóttur, svo og opnunarhátíðina í Háskólabíói.

Samskipti við STEF

Í september rituðu STEF, Samtök tónskálda og eigenda flutningsréttar, Hinsegin dögum, og kröfðust rúmlega 1.200.000 kr. í flutningsgjöld fyrir tónlist í gleðigöngunni og á Arnarhóli. Stjórn félagsins benti á að tónlist í göngunni væri á höndum göngufólks en ekki á vegum Hinsegin daga. Þá var í svörum Hinsegin daga vísað til höfundarréttarlaga þar sem kveðið er á um tónlist sem flutt er opinberlega án endurgjalds skuli vera undanþegin flutningsgjöldum eins og um var að ræða á tónleikum hátíðarinnar á Arnarhóli. Einnig var bent á að Hinsegin dagar væru sjálfboðaliðasamtök sem engan fjárhagslegan ávinning hefðu af hátíð sem þessari, tekjum væri aðeins ætlað að mæta kostnaði.

Hinsegin dagar nutu aðstoðar Ragnars Aðalsteinssonar lögmanns í þessu máli sem lauk með því að STEF féll frá kröfum sínum.

Erlend samskipti

Í október sóttu fjórir fulltrúar Hinsegin daga þing InterPride í Vancouver, en enginn sótti ársþing EPOA að þessu sinni. Katrín Jónsdóttir var einn varaforseta InterPride en lét af því starfi á árinu, og Kristín Sævarsdóttir er svæðisstjóri á Svæði 11, sem Ísland tilheyrir í hinu alþjóðlega samstarfi.

Fjárhagur og framtíðarhorfur

Gjöld ársins námu um 14,5 millj. kr., en tekjur 13,7 millj. kr. Helsta tekjulind félagsins var 4 milljóna kr. styrkur Reykjavíkurborgar, sem nú var veittur í annað sinn samkvæmt þriggja ára samningi, en auk þess auglýsingatekjur í dagskrárrit, tekjur af dansleikjum, sala varnings á hátíðinni og í verslun Hinsegin daga, svo og smærri styrkir einstaklinga og fyrirtækja.

Tíu ára afmælishátíð Hinsegin daga 2008 var án efa sú umfangsmesta sem haldin hefur verið í sögu þeirra. Útgjöld og tekjur hafa aldrei verið meiri, en í fyrsta skipti í fjögur ár varð töluverður halli á hátíðinni. Hann er þó ekki meiri en svo að ekki verði við hann ráðið, en nánar er greint frá fjárhag og fjármunahreyfingum hátíðarinnar í reikningsuppgjöri ársins sem lagt er fram á aðalfundi.

Búast má við að vegna efnahagshrunsins verði tekjur Hinsegin daga 2009 töluvert minni en á liðnu ári. Stjórn félagsins hefur þegar brugðist við þessu með áætlunum um samdrátt í kostnaði við auglýsingar og kynningar, svo og sparnað við fjölmarga aðra kostnaðarliði. Þá er óvíst hvort nokkrir erlendir skemmtikraftar verði kallaðir til liðs við hátíðina á þessu ári.