ÁVARP BORGARSTJÓRANS Í REYKJAVÍK

Góðir gestir – ladies and gentlemen.

Ég er afar ánægð með að fá að vera með ykkur hér í Háskólabíói í kvöld.  Það er ómetanlegt að sjá og skynja gleðina, stoltið og kraftinn í þeim hópi sem hér er samankominn.

Til hamingju með það – til hamingju með daginn, dagana sem eru framundan og þann árangur sem þið hafið náð og þann árangur sem við höfum sem þjóð á undaförnum árum náð – í að tryggja stöðu og réttindi samkynhneigðra.

Á samkomum og tímamótum sem þessum, í kringum rétindabaráttu samkynhneigðra, þakkar sá hópur sem hér er samankominn gjarnan fyrir sig.  Ég man t.d. eftir viðtali við fulltrúa úr ykkur hópi sem nefndi það einhverju sinni að Gay Pride gangan væri eins konar þakkarganga ykkar – þar sem þið vilduð gefa samfélaginu til baka og þakka þann árangur sem þið hafið sannarlega náð á undanförnum árum og áratugum.

Í kvöld langar mig að snúa þessu þakklæti við.  ÉG vil þannig þakka ykkur -  fyrir þau áhrif sem þið hafið haft á okkar góða samfélag – fyrir það hugrekki sem þið hafið sýnt með því veita samfélaginu hlutdeild í ykkar sorgum og sigrum – og gera okkur um leið að betra, fjölbreyttara og sanngjarnara samfélagi.
 
Við sem samfélag eigum það nefnilega ekki síst fólki eins og ykkur að þakka að við höfum þurft að horfast í augu við fordóma, velta því fyrir okkur hvað gerir okkur að manneskjum og hvernig við viljum að komið sé fram við okkur og aðra.

Við sem samfélag eigum það líka fólki eins og ykkur að þakka að hafa þurft að taka einarða afstöðu til grundvallarhugtaka eins og jafnréttis, sjálfsagðra mannréttinda og mannvirðingar.

Og sem betur fer búum við í samfélagi sem hefur tekið afstöðu með þeim grunngildum.

Og við eigum líka að þakka ykkur fyrir að hafa opnað augu okkar enn betur fyrir gildi og fegurð fjölbreytileikans. Fjölbreytileika sem meðal annars felst í því að fá að taka þátt í gleðigöngu niður Laugaveginn á hverju sumri. Því Hinsegin dagar eru svo sannarlega hátíð allra borgarbúa – sigurganga okkar allra til að fagna áunnum sigrum í áralangri baráttu samkynhneigðra fyrir sjálfsögðum mannréttindum.

Kæru gestir.

Þegar borgarbúar og fræðimenn víðs vegar um heiminn eru spurðir að því hvað geri borg að draumaborg – er óskin um fjölbreytileika oftast efst á blaði. „Borgin er ung, kraftmikil og fjölbreytt“ segir t.d. með miklu stolti í nýsamþykktri menningarstefnu Reykjavíkur.

Við viljum vera þannig borg.  Við viljum öll búa í borg þar sem fjölbreytileikinn fær notið sín – fólk býr við frelsi og hefur val um eigið líf og hamingju. Hinsegin dagar minna okkur á mikilvægi þessa sameiginlega skilnings.

Hátíðin er þannig táknrænn viðburður fyrir þá borg sem við viljum búa í.

Það er þess vegna sem einlæg ánægja og stolt skín úr hverju andliti þegar við borgarbúar og gestir okkar íslenskir og erlendir ganga þúsundum saman niður Laugaveginn til að sýna samstöðu sína á þessum hátíðardegi.  

Við hjá Reykjavíkurborg gerum okkur grein fyrir því hversu mikilvægt er að Hinsegin dagar séu haldnir í Reykjavík.

Mér er því sönn ánægja að tilkynna að borgarráð hefur samþykkt endurnýjaðan samstarfssamning við Hinsegin daga til næstu þriggja ára.

Ég og Heimir Már Pétursson munum undirrita þann samning hér á eftir.
 
Ladies and gentlemen,

the City of Reykjavik has throughout the years been the biggest supporter and sponsor of Reykjavík Gay Pride. It is a privilege to be able to celebrate general human rights - right here in our city and for that we are thankful.

The festival has been growing every year. The Gay Pride Parade and Concert are now one of the biggest events held in downtown Reykjavik. What I believe makes it unique is that the event not only draws lesbians, gay men, bisexuals and transgender people but also their families, supporters and general public. The Reykjavik Gay Pride has become an event that the citizens of Reykjavik look forward to every summer.

We are proud to be a city that celebrates diversity in this way and proud to be a country were the gay rights movement has made a significant progress in their fight for equal rights.  We as a society and as a city are thankful for their fight for equility – and we firmly believe that their efforts have made our country a better place to live and stay in.

I wish you all happy days here in Reykjavík.

Að endingu þakka ég öllum þeim sem komið hafa að undirbúningi þessa dags og göngunnar á Laugardag innilega fyrir hönd Reykjaíkuborgar og ítreka hamingju- og gleðióskir til ykkar allra.

Takk

Hanna Birna Kristjánsdóttir, borgarstjóri í Reykjavík
Hanna Birna Kristjánsdóttir, Mayor of Reykjavik